వందనం బొనర్తుమో ప్రభో ప్రభో
వందనం బొనర్తుమో ప్రభో ప్రభో /
వందనం బొనర్తుమో ప్రభో ప్రభో /
వందనంబు తండ్రి, తనయ, శుద్ధాత్ముడా
వందనంబు లందుకో ప్రభో ॥ వందనం॥
1.
ఇన్నినాళ్ళు ధరను మమ్ముఁ బ్రోచియుఁ /
గన్నతండ్రి మించి యెపుడు గాచియు /
ఎన్నలేని దీవెన లిడు నన్న యేసువా /
యన్నిరెట్లు స్తోత్రము లివిగో ॥ వందనం॥
2
ప్రాత వత్సరంపు బాహమంతయుఁ /
బ్రీతిని మన్నించి మమ్ము గావుము
నూత నాబ్దమునను నీదు-నీతి నొసగుమా /
దాత క్రీస్తు నాథ రక్షకా ॥ వందనం॥
3.
దేవ మాదు కాలుసేతులెల్లను /
సేవకాళి తనువు దినములన్నియు
నీ వొసంగు వెండి, పసిడి జ్ఞానమంత నీ /
సేవకై యంగీక రించుమా ॥వందనం॥
4.
కోతకొరకు దాసజనము నంపుము /
ఈతరి మాలోటుపాట్లు దీర్చుము /
పాతకంబులెల్ల మాపి భీతిఁబాపుము /
ఖ్యాతి నొందు నీతి సూర్యుడా ॥వందనం॥
5
మా సభలను పెద్ద జేసి పెంచుము /
నీ సువార్తజెప్ప శక్తి నీయుము
మోసపుచ్చు నంధకార మంత ద్రోయుము /
యేసు కృపన్ గుమ్మరించుము ॥ వందనం॥
రచన : మత్తయి సమూయేలు